NBI sa Bulacan, Isinusumbong!

raffytulfo@pldtdsl.net

ISang email na ipinadala sa inyong SHOOTER ni grace (di niya tunay na pangalan) ang lubos na nakatawag ng aming pansin. Isinusumbong niya ang bulok na sistema sa tanggapan ng nBI sa Plaridel, Bulacan:

Good day po sir Raffy, nalaman ko po na puwedeng mag e-mail ng sumbong sa inyo through Commuter Express ng MRT. Gusto ko po sanang isumbong ang bulok na sistema ng NBI dito po sa Plaridel Bulacan.

Madami pong kapalpakan ang mga empleyado dito. Minsan kumuha kami ng NBI clearance ng asawa ko sa tanggapang ito. Napakadami pong kumukuha rito, halos buong Bulacan dito na lang kumukuha kaysa lumuwas ng Maynila kasi mas malapit at makatitipid pa sila ng pamasahe, ang kaso, ang mga empleyado po ay pa petiks-petiks lang.

Karamihan po sa kanila ay nakukuha pang makipag-tsismisan sa oras ng trabaho, meron naman po pa-kape-kape pa kahit hindi pa naman break time. Ang iba po ay umaalis sa window nila kaya ang pila, diyos ko, umaabot hanggang kalsada at parang wala silang pakialam kung mahaba na ang pila dahil sa commercial breaks na ginagawa nila.

Ang finger printing naman po nila ay may bayad na P5, masyadong mahal kumpara sa P3 na bayad sa Maynila na kung tutuusin ay ang wet tissue lamang ang binabayaran mo. Masyado pong mahal ang singil nila. Ganun po ba ang dapat na presyo ng singil kapag sa probinsya? Masyadong mataas, hindi naman po namin alam kung saan napupunta ang kinikita nila sa finger printing na yan.

Ang mga teller pa po ay mahilig mamahiya. Kapag may konting mali sa naisulat ng aplikante, binabara at ipinapahiya nila ng naka- microphone at loud speaker. Ang nakakagulat pa po rito ay tumatanggap pala sila ng rush kaya lang patago kailangan mo lang usisain kung sino bang dapat mong kausapin sa loob. Kaya po namin nalaman ay dahil kilala ng asawa ko yung taga-bigay ng application sa may entrance at itinuro po kami sa loob at may kailangan lamang daw hanapin, kausapin at bayaran ng P800... Imbes na 10-14 days, eh magiging 5 days na lang ang hihintayin kung magdagdag bayad ka ng P800 sa regular na dapat mong bayaran. Kesyo pamasahe daw po nung tao na luluwas sa main office para mai-process kaagad ang papel...

Sa aking palagay ay iligal ang mga transaksyong iyon sana po mabisita ninyo ang tanggapan nila dito sa Bulacan sa lalong madaling panahon para matulungan po ninyo ang mga Bulakenyo, kawawa naman po ang mga mamamayan dito sa Bulacan na nagtitiis sa bulok na sistema nila... Maraming, maraming salamat po! Grace.

Salamat sa iyong e-mail grace. Sa araw ding ito, tatalakayin ng wanTEd Sa RadYO ang iyong sumbong at kapapanayamin ang mga kinauukulan ng nBI upang matuldukan na ang bulok na sistemang ito sa kanilang tanggapan sa Plaridel, Bulacan. Umasa ka.. R.T.