Rhian Ramos itinangging nanliligaw sa kanya si DJ Mo

By Alex Brosas

IN denial pa rin si Rhian Ramos sa tsismis na magdyowa sila ni DJ Mo.

“Ever since naman before, vocal na vocal ako na close kami. Sa showbiz, sa mga lalaki, siya ‘yung pinaka-close ko. Wala, totoo siyang kaibigan, eh. Puwede ko siyang sabihan ng mga sikreto,” paliwanag ni Rhian sa presscon ng Ilumina ng GMA-7 kamakailan.

“Hindi naman. Hindi, hindi siya nanligaw.”

Happy si Rhian na ipinagtatanggol siya ni DJ sa mga tsismis lalo na ‘yung issue sa kanila ni JC de Vera.

“Balita ko naman puro magaganda ang sinasabi niya. Na-appreciate ko ‘yon. Na-appreciate ko na kahit iniintriga na siya hindi niya papalitan ‘yung mga sagot niya. Puro magaganda ‘yung mga sagot niya,” Rhian said.

Ayon pa sa aktres, walang dahilan para hindi niya pakisamahan si DJ. Wala siyang pakialam kung makita man silang magkasama in public.

“Oo at hindi naman kami hiding or anything. Kung gusto ko lumabas kasama ang kaibigan ko, lalabas ako. Kasi kung may intriga, ‘yun ba ‘yung dahilan para tapusin mo ‘yung friendship mo sa tao? Parang hindi naman magandang gawain iyon,” esplika ng hitad.

“Nu’ng may lumabas na intriga, parang mas dumami ‘yung dahilan para kami mag-usap so mas nag-usap pa kami. Siyempre, iisipin n’yo na parang lalayuan namin ang isa’t isa. “Hoy, iniintriga tayo, ‘wag mo akong kakausapin dahil ang daming tao”. Parang gano’n?”

Sa ngayon, hindi niya nakikita si DJ Mo bilang suitor. “Hindi ko pa siya nakikita sa ganoong light kasi wala pa siyang pinapakita sa akin na dapat isipin kong romantic. Buti sana kung sa akin siya vocal pero wala naman siyang sinasabi, eh.”

Samantala, sinabi ni Rhian na hindi talaga action ang Ilumina.

“Not so much of action. Ang mga fighting kasi manggagaling kasi sa powers naming. Kung itim na sorsera, manggagaling ‘yung power sa pamaypay nila. Sa puting sorsera, sa payong manggagaling ang powers. Walang mas powerful. May balance dapat between good and bad or black and white. Pero, ayun na nga, nag-aaway ang dalawa kung hindi tama o hindi balance.

Magsisimula ang Ilumina sa Aug. 2 kasama sina Cesar Montano, Aljur Abrenica, Ara Mina, Jackie Rice, Jake Vargas, Jean Garcia, Paulo Avelino and Christopher de Leon under the direction of Mark Reyes.

***

TSUGI na ang Wowowee at bukas na ipalalabas ang kapalit nitong game show na hosts sina Kris Aquino, Robin Padilla, Mariel Rodriguez, Pokwang at Valerie Concepcion. Hindi na rin Pilipinas For The Win ang title ng show kundi “Pilipinas Win na Win.” Ayon sa tsikang nakarating sa amin, hindi kinaya ng powers ng Dos ang mga demands ni Willie kaya naman napagpasyahan na lang nilang tsugihin ang Wowowee na five years ding namayagpag sa ere.

Actually, nagpa-survey raw ang Dos sa TFC subscribers at maging sa mga empleyado nito. 75% raw ng TFC surbscribers ang lumabas na hindi feel si Willie na magbalik sa Wowowee at marami ring empleyado ng Dos ang against kay Papi.

Ayon pa rin sa tsismis, isang once-a-week show ang offer ng Dos kay Willie pero malamang ay hindi ito tanggapin ng TV host. unang-una, isang beses lang sa isang linggo ang exposure kaya malabo raw na sunggaban ito ni Papi.

Kaloka itong si Erich Gonzales. Talaga palang may pagkamaldita ang batang ito.

Nang mag-guest kasi siya sa Simply KC kamakailan ay binigyan siya ng pointers kung ano ang mga itatanong sa kanya. Sinabihan siyang tatanungin siya kung ano ang favorite chicken dishes niya kasi galing siya probinsya. Aba, hindi raw ito nagustuhan ng hitad at bakit naman pati iyon ay itatanong pa. Talagang inayawan niya ang tanong pero pinakiusapan siya na sagutin na lang niya ang tanong dahil harmless question naman ito.

Ang nakakatawa, nang sumalang na siya ay super sweet niyang sinagot ang tanong na may kinalaman sa chicken. Kaloka ang kaplastikan nitong si Erich.

One time naman, waiting sa elevator si Erich at mukhang imbiyerna dahil napasabay siya sa mga taong nag-audition sa Dos. May tumawag sa kanyang road manager pero deadma siya.

Yes, may mga ganoong drama raw itong si Erich na hindi na ma-reach!